चॅम्पियन्स ट्रॉफीतील (Champions Trophy 2025) खराब कामगिरीमुळे पाकिस्तान क्रिकेट टीमवर (Pakistan Cricket Team) त्यांचे फॅन्स नाराज आहेत. नुकत्याच झालेल्या चॅम्पियन्स ट्रॉफी स्पर्धेचा पाकिस्तान हा यजमान देश होता. पण, पहिले दोन सामने गमावल्यानंतर पाकिस्तानचं स्पर्धेतील आव्हान सेमी फायनलपूर्वीच समाप्त आलं. मैदानातील खराब कामगिरीमुळे पाकिस्तान टीमवर टीका होत आहे. त्याचवेळी पाकिस्तानचा माजी कॅप्टन आणि लोकप्रिय खेळाडू शाहिद आफ्रिदीवर (Shahid Afridi) त्याच्याच टीममधील माजी सहकाऱ्यानं गंभीर आरोप केला आहे.
पाकिस्तानी वंशाचा हिंदू क्रिकेट दानिश कनेरियानं (Danish Kaneria) शाहिद आफ्रिदीवर आरोप केले आहेत. कनेरियानं सांगितलं की, मला अनेकदा आफ्रिदीनं धर्मांतर करण्यास सांगितलं होतं. वॉशिंग्टन डीसीमध्ये काँग्रेसच्या एका ब्रीफिंगमध्ये पाकिस्तानमधील अल्पसंख्याकांची दुरावस्था या विषयावर माजी लेग स्पिनरनं उघडपणे त्याचा अनुभव मांडला.
कानेरियानं 2000 ते 2010 या कालावधीमध्ये 61 टेस्टमध्ये पाकिस्तानचं प्रतिनिधित्व केलं. तो राष्ट्रीय टीमकडून खेळणारा अनिल दलपतनंतरचा दुसरा हिंदू क्रिकेटपटू होता. देशात सन्मान मिळाला नाही त्यामुळेच अमेरिकेत जाण्याचा निर्णय घेतला, असं त्यानं सांगितलं.
